भक्तपुर जिल्ला बचत तथा ऋण सहकारी संघ लि.को २१औं बार्षिक साधारण सभा भक्तपुर बैंक्वेट भक्तपुरमा २०८२ साल कार्तिक २९ गते शनिबार सम्पन्न भयो ।
साधारण सभाको उद्घाटन गर्नुभएका नेपाल बचत तथा ऋण केन्द्रीय सहकारी संघ लि.का अध्यक्ष चन्द्रप्रसाद ढकालले बर्तमान अवस्थामा सहकारी संघ संस्थाको अवसर र चुनौती विषयमा सहकारी शिक्षा प्रदान गर्नुभयो । उहाँले सहकारी संघ संस्थाहरुले सुशासन कायम गरेमा सहकारीका धेरै समस्याहरु समाधान हुने बताउनुभयोे । उहाँले प्रारम्भिक बचत तथा ऋण सहकारी संस्थाले कारोबार गर्न बचत तथा ऋण सहकारी संघ आबश्यकता रहेको स्पष्ट पार्नुभयो । “बचत तथा ऋण सहकारीमा शुद्धिकरण आवश्यक रहेको तर कारोबार नै गर्न नदिने गरी नियन्त्रण गर्न मिल्दैन”, उहाँको भनाई थियो ।
भक्तपुर जिल्ला बचत तथा ऋण सहकारी संघ लि.का अध्यक्ष कृष्णगोविन्द लाखाजुको अध्यक्षतामा साधारण सभा सम्पन्न भएको थियो । त्यस अवसरमा उहाँले “सहकारीको विकल्प सहकारी नै हो, सहकारीको विकल्प कुनै बैंङ्क तथा वित्तीय संस्था हुन सक्दैन”, भन्नुभयो । उहाँले समुदाय केन्द्रित र सहकारी मुल्य मान्यता र सिद्धान्त बमोजिम सञ्चालित सहकारी सङ्घ संस्थाहरुमा परिस्थितिवश केही समस्या भएतापनि जटिल समस्या नरहेको बताउनुभयो । उहाँले विषम परिस्थितिमा सदस्य तथा समाजमा सेवा पु-याइरहेका सहकारी सङ्घ संस्थाहरुलाई संकुचनमा ल्याउन र जिल्ला बचत सङ्घ लगायत सहकारी सङघहरुलाई आफ्नो सदस्य संस्थाहरुबीचको वित्तीय कारोवारलाई रोक लगाउने खालका मापदण्ड र निर्देशनहरु जारी भएकोमा विरोध जनाउदै आएको बताउनुभयो ।
उक्त संघका संस्थापक अध्यक्ष राजेन्द्र दुमरुले सो संघ स्थापनाको चर्चा गर्दै संघ स्थापनाको मर्म बमोजिम संघले कार्य गर्दै आएकोमा खुशी व्यक्त गर्नुभयो ।
सोही संघका उपाध्यक्ष हरिकृष्ण बल्लले स्वागत मन्तव्य व्यक्त नियमनकारी निकायको बहु निर्देशनको चपेटामा सहकारी संघ संस्थाहरु रहेको बताउनुभयो ।
साधारण सभामा त्यसै संघका सचिव जगनाथ प्रजापतिले संघको बार्षिक प्रगति प्रतिवेदन पेश गर्दै लामो समयदेखि स्वायतता र स्वनियमको नाममा एकलौटी व्यवसाय झैं सञ्चालन गरिरहेका सहकारीका सञ्चालकहरूले जनताको निक्षेप फिर्ता नदिई भाग्ने प्रवृति अझै रोक्न नसकेकोमा चिन्ता व्यक्त गर्नुभयो । उहाँले सहकारी अभियानमा देखापरेका विकृति र विसंगति रोक्न आफैवाट शुरु गर्नु पर्ने आवश्यकता औल्याउनुभयोे । उहाँले जनताको पैसा निक्षेप फिर्ता नदिई भाग्ने सञ्चालक तथा कर्मचारीहरुलाई कुनै पनि राजनैतिक दवाव र प्रभावमा नपारी हदैसम्मको कारबाही गर्नु पर्ने विचार व्यक्त गर्नुभयो । उहाँले प्रस्तुत गरेको संघको आ.व.२०८१/०८२ को वार्षिक प्रगति प्रतिवेदन र आ.व. २०८२/०८३ मा रु.२८ लाखको प्रस्तावित कार्यक्रमहरु साधारण सभाले पारित गरेको थियो ।
यसैगरी साधारण सभामा सो संघका कोषाध्यक्ष कान्छभक्त घजुले संघको आर्थिक प्रगति प्रदिवेदन पेश गर्दै बचत तथा ऋण सहकारीमा बचत तथा ऋणको सन्तुलन कायम गर्न चुनौती बढेको बताउनुभयो । उहाँले सहकारी संघ संस्थामा तरलता बढदै गएको तर ऋण मागको कमिका कारण ऋण लगानी घट्दै जाने अवस्थाले सहकारी सञ्चालनमा सकस थप्दै गएको बताउनुभयो । उहाँले पेश गरेको आ.व.२०८१/०८२ को वासलात रु.तीन अर्ब बाह्र करोड, आय रु. एक करोड सात लाख सहितको आर्थिक प्रगति प्रतिवेदन र आ.व.२०८२/०८३ को वासलात रु तीन अर्ब पन्ध्र करोडको अनुमानित बजेट साधारण सभाले पारित गरेको थियो ।
साधारण सभामा उक्त संघका लेखा सुपरीवेक्षण समितिका संयोजक बालमुकुन्द उपाध्यायले संघको आ.व. २०८१/०८२ को लेखा सुपरीवेक्षण समितिको प्रतिवेदन पेश गर्दै मौजुदा सहकारी ऐन, कानुन र निर्देशनका आधारमा संघको कारोबारलाई सिमिततामा ल्याउँदा अझ घट्ने भएकोले संघ सवलिकरणका कार्यक्रम तथा योजना ल्याउनुपर्ने विचार व्यक्त गर्नुभयो ।
साधारण सभाले शेयर लाभांश कोषबाट ४.६ प्रतिशत लाभांश प्रदान गर्ने प्रस्ताव पारित गरेको छ । साथै साधारण सभालृ सहकारी ऐन नियमावली अनुसार संरक्षित पुँजी फिर्ता कोष फिर्ता गर्ने प्रस्ताव समेत पारित गरेको छ ।
साधारण सभामा २०३ सदस्य संस्थामध्येबाट १७७ जना प्रतिनिधिको उपस्थिति रहेको थियो ।
सञ्चालक समितिको अध्यक्षमा हरिकृष्ण बल्ल र लेखा सुपरीवेक्षण समिति संयोजकमा दामोदर न्यौपाने चयन
भक्तपुर जिल्ला बचत तथा ऋण सहकारी संघ लि.को सो साधारणबाट हरिकृष्ण बल्लको अध्यक्षतामा ९ सदस्यीय सञ्चालक समिति र दामोदर न्यौपानेको संयोजकत्वमा ३ सदस्यीय लेखा सुपरीवेक्षण समिति चयन गरेको छ ।
४ वर्षे कार्यकाल रहने उक्त सञ्चालक समितिको उपाध्यक्षमा जगनाथ प्रजापति, सचिवमा कान्छाभक्त घजु, कोषाध्यक्षमा कृष्णश्वरी प्रजापति र सदस्यमा इन्द्रप्रसाद व्याञ्जु, चण्डिका छुका, सुशिला पराजुली बराल, राजकुमार लघु र विवेक श्रेष्ठ चयन हुनुभएको छ । यसैगरी लेखा सुपरीवेक्षण समिति सदस्यमा गीताप्रसाद नेपाल र प्रतिभा अदुवा श्रेष्ठ हुनुहुन्छ ।
