नेकपा (माके)का अध्यक्ष तथा प्रधानमन्त्री पुष्पकमल दाहाल ‘प्रचण्ड’कि श्रीमती सीता दाहालको आज भएको निधनमा विभिन्न राजनीतिक दलका नेतादेखि पूर्व राजा ज्ञानेन्द्र शाहसम्मले शोक प्रकट गरे । नेकपा (माके)कि सल्लाहकार समेत रहेकी सीता दाहालको निधनमा नेपाली कांग्रेसका सभापति शेरबहादुर देउवा , नेकपा (एमाले)का अध्यक्ष खड्गप्रसाद शर्मा ओली , नेकपा (एस)का अध्यक्ष माधवकुमार नेपाल र सम्मानित नेता झलनाथ खनाल, जसपाका अध्यक्ष उपेन्द्र यादव, नेसपाका अध्यक्ष डा.बाबुराम भट्टराई, रास्वपाका सभापति रवि लामिछाने , राप्रपाका अध्यक्ष राजेन्द्र लिङ्देन, लोसपाका अध्यक्ष महन्त ठाकुर, नेपाल कम्युनिष्ट पार्टीका अध्यक्ष ऋषि कट्टेल लगायतले शोक व्यक्त गर्दै नेकपा (माके) र दाहाल परिवारमा समवेदना व्यक्त गरेका छन् । यसैगरी समाजवादी मोर्चा , नेकपा (माके) लगायतले उहाँको निधनमा शोक विज्ञप्ति जारी गरि दिवंगत सीता दाहालप्रति श्रद्धाञ्जली प्रकट गर्दै शोकाकुल सबैमा समवेदना व्यक्त गरेका छन् ।
आज अपरान्ह दिवंगत दाहालको पार्थिव शरीर राजकीय सम्मानका साथ पशुपति आर्यघाटमा अन्त्येष्टि गरियो । उहाँको पार्थिव शरीरमा आफ्ना दुई छोरीहरु रेणु र गंगाको साथमा प्रधानमन्त्री प्रचण्डले दागबत्ती दिनुभएको थियो भने उप-प्रधानमन्त्रीद्वय पूर्णबहादुर खड्का र नारायणकाजी श्रेष्ठ ‘प्रकाश’ले दिवंगत दाहालको पार्थिव शरीरमा राष्ट्रिय झ्ण्डा ओडाउनुभयो । त्यसबेला त्यहाँ पूर्व प्रधानमन्त्रीहरु शेरबहादुर देउवा, खड्गप्रसाद शर्मा ओली, माधवकुमार नेपाल र डा.बाबुराम भट्टराई , बर्तमान र पूर्व मन्त्रीहरु, सांसदहरु , नेकपा (माके) सहितका विभिन्न राजनीतिक दलका नेता र कार्यकर्ताहरु ,विदेशी कुटनीतिक नियोगका प्रतिनिधिहरु, विभिन्न क्षेत्रमा क्रियाशील व्यक्तिहरु लगायत ठूलो संख्यामा मानिसहरुको अपार उपस्थिति षियो ।
त्यस अघि २ घण्टा दिवंगत दाहालको पार्थिव शरीर श्रद्धाञ्जलीका लागि नेकपा (माके)को केन्द्रीय कार्यालय पेरिसडाँडामा राखिएको थियो । त्यहाँ नेकपा (माके) सहित निभिन्न राजनीतिक दलका नेता कार्यकर्ताहरु, पूर्व राजा ज्ञानेन्द्र शाहका प्रतिनिधि पशुपतिभक्त महर्जन लगायतले दिवंगत दाहालप्रति श्रद्धाञ्जली व्यक्त गरेका थिए ।
