भक्तपुर नगरपालिका-२, ब्यासीमा रहेको ख्वप बचत तथा ऋण सहकारी संस्था लि. को १७औं स्थापना दिवसको अवसरमा सो संस्थाको स्वास्थ्य उप-समितिको आयोजना तथा कान्तिपुर अस्पताल रक्तसञ्चार समूहको प्राविधिक सहयोगमा ब्यासीमा २०८१ भाद्र १५ गते शनिबार चियापान कार्यक्रम सहित रक्तदान कार्यक्रम सम्पन भयो । कार्यक्रममा सोही संस्थाका अध्यक्ष राजकुमार लघुले संस्थाको गतिविधिबारे चर्चा गदै ‘सदस्यहरुका आर्थिक मात्र नभई शैक्षिक, सामाजिक र सांस्कृतिस्तर उकास्न संस्थाको क्षमताले भ्याएको कार्यक्रम सञ्चालन गरिरहेको छ’, भन्नुभयो । उहाँले सामाजिक सेवा अन्तर्गत हाम्रो यो संस्था स्थापना दिवसको अवसरमा रक्तदान कार्यक्रम आयोजना गरिएको बताउनु भयो । संस्थाका सल्लाहकार बालमुकुण्ड बासुकलाले उक्त संस्थाको प्रगतिप्रति शुभकामना ब्यक्त गर्दै संस्थापक तथा समिति र उप-समितिहरुका सदस्यहरु सरसल्लाह गरी गतिविधि अगाडि बढाउनुपर्छ’, भन्नुभयो । त्यसै संस्थाका सल्लाहकार कुमार लघुले ‘संस्थापक तथा अग्रजहरुलाई निरन्तर सम्मान गर्नुपर्ने र वार्षिक मात्र नभई चार बर्षीय रणनितिक योजना बनाई संस्था अगाडि बढे लक्ष्य अनुसार सफलता हात लाग्छ’, भन्नुभयो । कार्यक्रममा संस्थाका कोषाध्यक्ष तथा स्वास्थ्य उप-समितिका संयोजक लक्ष्मीनारायण सुवालले रक्तदान कार्यक्रमको तयारी बारे जानकारी दिनुभयो ।
सो संस्थाको १७औं स्थापना दिवसको अवसरमा आयोजित रक्तदान कार्यक्रममा महिला पुरुष गरि ३० जनाले रक्तदान गरी मानविय भावना प्रस्तुत गर्नभएको थियो ।
