स्थानीय तहमा जनप्रतिनिधि निर्वाचित गर्न मतदान हुदै

काठमाडौं/ आगामी ५ वर्षका लागि स्थानीय तहका जनप्रतिनिधि निर्वाचित गर्न आज बिहानबाट मतदान शुरु भएको छ ‌। ६ वटा महानगरपालिका, ११ वटा उप-महानगरपालिका , २७५ वटा नगरपालिका र ४६० वटा गाउँपालिकाका ,३५,२०० भन्दा बढी जनप्रतिनिधि छनौटका लागि यतिबेला निर्वाचन हुदैछ । कपिलवस्तुको महाराजगञ्ज नगरपालिकाको नेपाली कांग्रेसकी उप-मेयर पदकी उम्मेद्वार तथा सोही नगरपालिकाकी नि:बर्तमान उप-मेयर सुभावती कुर्मी र तुलसीपुर उप-महानगरपालिकाको १ वडाका वडा अध्यक्ष पदका उम्मेद्वारको निधन भएकोले त्यहाँ भने आज निर्वाचन नहुने निर्वाचन आयोगले जनाएको छ ।

बिहानैदेखि लाइनमा बसेका मतदाताहरुले मतदान गरिरहेका छन् । अपरान्ह ५ बजेसम्म लाइनमा बसेका मतदाताले मतदान गर्न पाउने बताइएको छ । मतदान सकिएपछि मतपेटिका जम्मा भएपछि त्यसको १ घण्टाभित्र मतगणना शुरु हुने निर्विघ्न आयोगका अधिकारीहरुले बताएका छन् ।