भक्तपुर/ भक्तपुर जिल्ला बचत तथा ऋण सहकारी संघ लि.को व्यवस्थापन उप-समितिको आयोजनमा शनिबार स्वीट होम, भक्तपुरमा १ दिवसीय बजार प्रतिनिधिहरुको क्षमता अभिबृद्धि तालिम सम्पन्न भयो । नेफ्स्कूनको प्राविधिक सहयोगमा सम्पन्न सो तालिममा मन्तव्य व्यक्त गर्दै भक्तपुर जिल्ला बचत तथा ऋण सहकारी संघ लि.का अध्यक्ष कृष्णगोविन्द लाखाजुले सहकारी संस्थाको सेवा सदस्यको घरदैलोमै पु-याउने अवधारणाको विकास भएर सहकारी संस्थाले बजार प्रतिनिधिहरुको व्यवस्था गरेको बताउदै बजार प्रतिनिधिले रकम संकलन गर्ने काम मात्र नगरी सहकारीको मुल्य, मान्यता र सिद्धान्तबारे ज्ञान हासिल गरी सदस्यलाई त्यस सम्बन्धी सेवा प्रवाह गर्नु पर्ने आवश्यकता औल्याउनुभयो ।
उक्त आवसरमा सोही संघका सञ्चालक एवं व्यवस्थापन उप-समितिका संयोजक इन्द्रप्रसाद व्याञ्जुले बजार प्रतिनिधि सहकारी संस्थाको प्रमुख सेवा प्रदायक भएकोले संस्थाको बस्तु तथा सेवा विक्रीमा महत्वपूर्ण भूमिका रहने बताउदै सहकारी संस्था र आफ्नो व्यक्तिगत विकासका लागि तालिमबाट सिकेका ज्ञान र सीप व्यवहारमा प्रयोग गर्नु पर्नेमा जोड दिनुभयो ।
