रुपन्देहीको क्षेत्र नं.५ मा नेकपा (एमाले) का उम्मेद्वार बाशुदेव घिमिरेलाई अगाडि मनोनयन दर्ता गरेको भन्दै निर्वाचन आयोगले आधिकारिता दिएपछि सोही पार्टीका अर्का उम्मेद्वार खिमलाल भट्टराई हिस्स पर्नु भएको छ । राष्ट्रिय सभा सदस्य पदबाट राजिनामा दिएका नेकपा (एमाले)का नेता खिमलाल भट्टराई र सोही पार्टीका नेता तथा तिलोत्तमा नगरपालिकाका नि:बर्तमान मेयर बाशुदेव घिमिरेले नेकपा (एमाले)को आधिकारिक उम्मेद्वारको पत्र पेश गरी प्रतिनिधि सभा सदस्य पदको उम्मेद्वार मनोनयन गर्नु भएको थियो । आइतबार दिउसो ३:३० मा र भट्टराईले ४:४५ मा उम्मेद्वारी मनोनयन गर्नु भएको थियो , जस अनुसार घिमिरेको उम्मेद्वार मनोनयन दर्ता नं ११ र भट्टराईको १७ रहेको बताइएको छ ।
अनेरास्वियुको अध्यक्ष हुदै नेकपा (एमाले)को केन्द्रीय तहमा पुगेका खिमलाल भट्टराई राष्ट्रिय सभामा नेकपा (एमाले)को दलको नेता हुनुहुन्थ्यो । उहाँले राजिनामा दिएसँगै नेकपा (एमाले)को राष्ट्रिय सभामा एक सीट घटेको छ । यता रुपन्देहीको ५ नं. क्षेत्रमा नेकपा (एमाले)को आधिकारिक उम्मेद्वारको मान्यता पाएका बाशुदेव घिमिरेलाई तिलोत्तमा नगरपालिकाका सफल मेयरको रुपमा चित्रित गर्ने गरिएको छ , जसले अगाडि बढाएको विकासलाई मोडेललाई धेरै तारिफ गर्ने गरेका छन् ।