बुटवल/ अखिल नेपाल किसान यूनियनले सरकारले बुटवलमा सुकुम्बासीहरु माथ गोली चलाएर हिजो ४ जना सुकुम्बासीको हत्या र दर्जनौं घाइते भएको घटनाप्रति तीब्र बिरोध, निन्दा र भर्त्सना गरेको छ । सो यूनियनका अध्यक्ष लोकनारायण सुवेदीले एक विज्ञप्ति जारी गरी सो घटनाको बिरोध गर्नु भएको छ । उक्त यूनियनका अध्यक्ष सुवेदी द्वारी जारी विज्ञप्तिमा मृतक सुकुम्बासीहरूप्रति श्रध्दाञ्जली प्रकट गर्दै ‘उनीहरूका परिबारका लागि यथेष्ठ क्षतिपूर्ति दिन तथा सबै घाइतेहरूको सम्पूर्ण उपचार खर्च राज्यले ब्यहोर्न जोडदार माग गर्दछ’ भनिएको छ । ।
त्यस विज्ञप्तिमा अगाडि भनिएको छ- ‘सुकुम्बासी समस्या समाधानको प्रष्ट र न्यायपूर्ण नीति नबनाएर जहिले पनि गोली डण्डा बर्षाउने अनि कर्फ्रयू लगाउने र समस्यालाई असरल्लै छोड्ने, जुन गलत प्रबृति राज्यले देखाउदै आएको छ, त्यसले गर्दा बर्षौदेखि यो समस्या कचल्टिएको छ र आफ्ना आसेपासे र झोलेलाई जग्गा बाँडेर सुकुम्बासी समस्यालाई जहिले पनि समाधानहीन राख्ने र सुकुम्बासीहरुको हत्या गर्ने क्रम जारी राख्ने गर्दै आएको प्रष्टै देखिन्छ ।
अखिल नेपाल किसान यूनियन बास्तविक सुकुक्बासीका लागि उचित बसोबास, शिक्षा, स्वास्थ्य र रोजगारीको जिम्ँमेवारी राज्यले लिन र यस समस्याको दीर्घकालीन समाधान खोजेर उनीहरुको जीवन सुरक्षा र सुनिश्चित भबिष्यको प्रबन्ध गर्न पुनः जोडदार माग गर्दछ । साथै बुटबलमा हिजो थरिएको प्रहरी परिचालन र हत्या काण्डको तुरुन्तै न्यायपूर्ण छानबिन गर्न र मृतक परिबारलाई यथेष्ठ क्षतिपूर्ति दिन तथा घाइतेहरु सबैको निःशुल्क उपचार गर्न समेत अखिल नेपाल किसान यूनियन जोडदार माग गर्दछ ।’
