नेकपा (एमाले)का अध्यक्ष खड्गप्रसाद शर्मा ओलीले आफ्नो पार्टीका प्रतिनिधि सभा सदस्यहरुलाई सांसद पदको सपथ ग्रहण गर्न आउदा राष्ट्रिय पोशाक लगाउन निर्देशन दिनु भएको सो पार्टीले जनाएको छ । मंगलबार नेकपा (एमाले)को संसदीय दलको नेता चयन भएपछि सांसदहरुलाई उक्त निर्देशन दिनु भएको बताइएको छ । सांसद पदको सपथ ग्रहण भने इच्छा अनुसार नेपाली या मातृ भाषामा गर्न सक्ने सांसदहरुको भनाई छ ।
भोलि प्रतिनिधि सभाका नवनिर्वाचित सदस्यहरुलाई उक्त पद तथा गोपनियताको सपथ ग्रहण गर्ने कार्यक्रम रहेको जनाइएको छ । प्रतिनिधि सभाका उमेरले जेष्ठ सदस्य पशुपति शमशेर जबराले सांसदहरुलाई पद तथा गोपनियताको सपथ ग्रहण गराउने कार्यक्रम रहेको संघीय संसद सचिवालयले जनाएको छ । प्रतिनिधि सभामा समानुपातिक प्रणालीतर्फबाट निर्वाचित राप्राका ८१ बर्षीय प्रतिनिधि सभा सदस्य जबराले आज राष्ट्रपति विद्यादेवी भण्डारीबाट सांसदको पद तथा गोपनियतको सपथ ग्रहण गर्दै हुनुहुन्छ । प्रतिनिधि सभाको सभामुख चयन नहुदासम्म सांसद जबराले प्रतिनिधि सभामा हभामुखको भूमिका निर्वाह गर्नु हुने छ ।