सहकारी संस्था दर्ता गर्न आउन दोश्रो पटक थपिएको म्याद सकिन १० दिनमात्र बाँकी रहदा २,४७७ वटा सहकारी संस्था मात्र राष्ट्रिय सहकारी नियमन प्राधिकरणमा विधिवत रुपमा दर्ता भएका छन् । आज दिउसोसम्म कोशी प्रदेश भित्रका ३९६ वटा, मधेश प्रदेश भित्रका २३० वटा, बागमती प्रदेश भित्रका १,१९२,गण्डकी प्रदेशभित्रका १८५ वटा , लुम्विनी प्रदेश भित्रका ३५८ वटा ,कर्णाली प्रदेश भित्रका ३२ वटा र सुदूरपश्चिम प्रदेश भित्रका ८२ वटा सहकारी संस्था मात्र सो प्राधिकरणमा विधिवत दर्ता भएको सोही प्राधिकरणका अध्यक्ष डा. खगराज शर्माको सचिवालयले जनाएको छ ।
राष्ट्रिय सहकारी नियमन प्राधिकरणले निर्धारण गरेको समयभित्र सहकारी संघ संस्थाहरु सो प्राधिकरणमा दर्ता हुन नआएपछि उसले सहकारी संघ संस्थालाई दर्ता हुन आउन अनुरोध गरी दुई पटक म्याद थप गरेको हो । यो थपिएको दोश्रो पटकको समयपनि यही फाल्गुण ११ गते सकिदैछ ।
“यो प्राधिकरणमा दर्ता प्रक्रिया झण्झटिलो छ र यसको सफ्टवेयरमा त्यहाँको सिष्टमले दर्ताको प्रक्रियाका लागि डकुमेण्ट लग इन गर्दा सजिलै एसेप्ट गरी दिदैन, त्यही भएर चाहेरपनि उल्लेख्य मात्रामा सहकारी संस्थाहरु दर्ता हुन नसकेको कतिपय सहकारी अभियन्ताको भनाइ छ । राष्ट्रिय सहकारी नियमन प्राधिकरणले सहकारी दर्ता सम्बन्धी आवश्यकता अनुरुप सहकारी संघ संस्थाहरुमा सहकारी दर्ता सम्बन्धी राम्रोसँग अभिमुखीकरण /तालिम सञ्चालन नगरेकाले पनि त्यहाँ धेरै सहकारी संघ संस्थाहरु चाहेर पनि दर्ता हुन नआएको जानकारहरु बताउछन् ।
“यो प्राधिकरणको क्षेत्राधिकार ठूलो छ तर यहाँ आवश्यकता अनुरुप कर्मचारीको दरबन्दी व्यवस्था गरिएको छैन र व्यवस्था भएको दरबन्दी अनुरप नेपाल राष्ट्र बैक लगायतबाट आउनु पर्ने कर्मचारी पनि नआएकाले काम गर्न गाह्रो परिरहेको छ”, उक्त प्राधिकरणका एक कर्मचारी बताउछन् ।
यता उक्त प्राधिकरणमा सहकारी सम्बन्धी १८२ वटा उजुरी तथा गुनासो दर्ता भएको सोही प्राधिकरणकी अधिकृत विनिता धितालको भनाइ छ ।
