ललितपुर जिल्ला बचत तथा ऋण सहकारी संघ लि को नयाँ नेतृत्व चयन सहितको २८औं वार्षिक साधारण सभा यही भदौ २७ गते सोमबार ललितपुरको महालक्ष्मीस्थानस्थित त्रिशक्ति पार्टी प्यालेसमा हुने भएको छ ।
उक्त दिन विहान त्यस संघको २८औं वार्षिक साधारण सभाका कार्यक्रम सञ्चालन हुने र त्यसपछि सोही संघको सञ्चालक समिति र लेखा सुपरीवेक्षण समितिको पदाधिकारी र सदस्य चयनको औपचारिक प्रक्रिया शुरु हुने जनाइएको छ । यसबेलासम्म सो संघको अध्यक्ष पदमा राष्ट्रिय सहकारी बैंक लि.का सञ्चालक समेत रहेका त्यसै संघका बर्तमान अध्यक्ष रामहरि बजगाईँ र सञ्चालक नरेन्द्र महर्जनले उम्मेद्वारी दिने बताउनुभएको छ तर सर्वसम्मत ढंगबाट सञ्चालक समिति र लेखा सुपरीवेक्षण समितिका पदाधिकारी र सदस्य चयनका लागि प्रयास पनि भइरहेको सरोकारवालाहरुले बताएका छन् । यही भदौ २५ गते शनिबार दिउसो सञ्चालक समिति र लेखा सुपरीवेक्षण समितिका पदाधिकारी र सदस्य पदको उम्मेद्वारी मनोनयन हुने निर्वाचन समितिले जनाएको छ ।
सो संघको सञ्चालक समिति र लेखा सुपरीवेक्षण समितिको पदाधिकारी र सदस्य पदमा यदी सर्वसम्मत नभएको अवस्थामा विद्युतीय भोटिङ मेसिनको प्रयोगबाट निर्वाचन कार्यक्रम सम्पन्न गर्ने योजना रहेको निर्वाचन समितिले जनाएको छ । हाल त्यस संघमा ४८१ वटा साकोस सदस्य रहेका जनाइएको छ ।
यही भदौ २४ गतेसम्म विधिवत दर्ता भएका प्रतिनिधिले मात्रै सो साधारण सभाको सबै कार्यक्रममा भाग लिन पाउने र त्यसका लागि सार्वजनिक बिदाको दिन भएपनि सो दिन पुरै समय ललितपुर जिल्ला बचत तथा ऋण सहकारी संघ लि.को कार्यालय सञ्चालन हुने सोही संघका व्यवस्थापक सन्तोष बजगाईँले अलगपथलाई बताउनुभयो । गत असार मसान्तसम्म यो संघको कुल कारोवार रु.१ अर्ब ५९ करोड रहेको थियो ।