कतारमा जारी २२औं संस्करणको फिफा विश्वकप फुटबलको गएराती सम्पन्न प्री क्वाटर फाइनल खेलमा समूह ‘बी’को विजेता इङ्ल्याण्ड समूह ‘ए’ को उप-विजेता सेनेगललाई ३-० गोल अन्तरले पराजित गरी क्वाटर फाइनल प्रवेश ग-यो । शनिबार हुने क्वाटर फाइनल खेलमा पूर्व विश्वकप फुटबल विजेता ईङ्ल्याण्डले अर्को विश्वकप फुटबल विजेता फ्रान्ससँग खेल्ने छ । यो विश्वकप फुटबलका दाबेदार मानिएका यी दुई टोली बीचको खेल निके रोमाञ्चक हुने आँकलन गरिएको छ । फ्रान्स आईतबार साझ भएको प्री क्वाटर फाइनल खेलमा पोल्याण्डलाई ३-१ गोल अन्तरले पराजित गरी क्वाटर फाइनल प्रवेश गरेको हो ।
नेपाली समय अनुसार गएको मध्यरातमा भएको इङ्ल्याण्ड र सेनेगल बीचको खेलको ३८औं मिनेटमा जुड बेलिङ्घमको पासमा जोर्डन हेण्डर्सनले गोल गरी इङ्ल्याण्डलाई अग्रता दिलाए । त्यसैगरी खेलको पहिलो हापको इञ्जुरी समयको अन्तिम मिनेटमा फिल फर्डेन र जोर्डन हेण्डर्सन सहयोगमा कप्तान ह्यारी क्यानले गोल गरी इङ्ल्याण्डको अग्रता दोब्बर बनाए । इङ्ल्याण्डका लागि ५२औं अन्तर्राष्ट्रिय गोल गरेका कप्तान ह्यारी केनको जारी विश्वकप फुटबलमा यो पहिलो गोल हो ।
खेलको ५७औं मिनेटमा फिल फोडेनको पासमा बुकायो साकाले गोल गरी इङ्ल्याण्डलाई ३-० गोल अन्तरले अग्रता बनाए । यो खेलमा सेनेगलका खेलाडीको गोल गर्ने प्रयासलाई इङ्ल्याण्डका गोल रक्षकले बिफल पारेका थिए । खेलमा जुड बेलिङ्घमले उत्कृष्ट खेल खेलेका थिए ।
