नेपाली कांग्रेसका नेता उद्धव थापाको कोशी प्रदेशको मुख्यमन्त्री नियुक्ति विरुद्ध शुक्रबार नेकपा (एमाले)ले सर्वोच्च अदालतमा दायर गरेको रिटमाथि आज पेशी तोकिएको सर्वोच्च अदालतका रजिष्टार विमल पौडेलको भनाइ छ । ४ दलीय गठबन्धनको समर्थनमा नेपाली कांग्रेसका नेता उद्धव थापालाई मुख्यमन्त्री नियुक्त गरेको कार्य बदर गरी कोशी प्रदेशमा सबैभन्दा ठूलो दलको नेताको हैसियतमा नि:बर्तमान मुख्यमन्त्री हिक्मत कार्कीलाई कोशी प्रदेशको मुख्यमन्त्री नियुक्त गर्नु पर्ने माग गर्दै कोशी प्रदेश प्रमुख पर्शुराम खापुङ , कोशी प्रदेशको नवगठित सरकार र कोशी प्रदेश सभाका सभामुख बाबुराम गौतमलाई विपक्षी बनाइ नेकपा (एमाले)ले सर्वोच्च अदालतमा मुद्धा दायर गरेको थियो ।
९३ सदस्यीय कोशी प्रदेश सभाका सभामुख सहित ४७ सदस्यको समर्थनमा यही असार २१ गते नेपाली कांग्रेसका नेता उद्धव थापा कोशी प्रदेशको मुख्यमन्त्री नियुक्त हुनुभएको थियो । शुक्रबार प्रदेश प्रमुख खापुङबाट पद तथा गोपनियताको सपथ ग्रहण गरी पदभार सम्हालेका नवनियुक्त मुख्यमन्त्री थापाले नेपाली कांग्रेसका प्रदीप सुनुवार र नेकपा (एस)का कमल जबेगुलाई विना विभागीय मन्त्री नियुक्त गर्नु्भएको थियो ।
कोशी प्रदेश सभामा उपसभामुख सहित नेकपा (एमाले)का ४०, नेपाली कांग्रेसका २९, सभामुख सहित नेकपा (माके)का १३, राप्रपाका ६ , नेकपा (एस)का ४ र जसपाका १ सदस्य छन् ।
कोशी प्रदेश सभाबाट आफ्नो सरकारले विश्वासको मत प्राप्त गर्छ : मुख्यमन्त्री थापा
कोशी प्रदेशका नवनियुक्त मुख्यमन्त्री उद्धव थापाले आफू नेतृत्वको कोशी प्रदेश सरकारले कोशी प्रदेश सभाबाट विश्वासको मत पाउछ भन्नुभएको छ । शनिबार आफू कोशी प्रदेशको मुख्यमन्त्री बनेकोमा आफूलाई स्वागत गर्न नेपाली कांग्रेसले झापाको व्यापारिक नगरी बिर्तामोडमा आयोजना गरेको कार्यक्रममा उहाँले सो कुराबताउनुभएको हो ।