नक्कली भुटानी शरणार्थी प्रकरणमा सम्लग्न भएको ठहर गरि प्रहरीले आज विहान हज कमिटीका अध्क्ष शमशेर मियालाई सिंहदरबार भित्रैबाट पक्राउ गरेको जनाएको छ । गृह मन्त्रालयबाट कागजात मगाएर उर्जा, जलश्रोत तथा सिञ्चाई मन्त्रालयमा बसेर कार्य गर्दै आएका मियालाई पिछा गरि प्रहरीले पक्राउ गरेको जनाइएको छ ।
नेकपा (एमाले)का सांसद एवं पूर्व उपप्रधान तथा उर्जा मन्त्री टोपबहादुर रायमाझी मार्फत बिचौलियाहरुसँग सम्पर्कमा पुगेका मियाले नक्कली भुटानी शरणार्थी प्रकरणमा पक्राउ परेका ललितपुरका सानु भण्डारी र मोरङका केशव दुलाललाई आफूले चढ्न भनेर गृह मन्त्रालयबाट लिएको बी ए बी १४०५ नम्बरको गाडी यसै प्रकरण अन्तर्गतको काममा प्रयोग गर्न दिएको अनुसन्धानबाट खुलेको प्रहरीको भनाइ छ ।
मिया सहित यो प्रकरणमा पक्राउ पर्नेको संख्या १५ पुगेको छ । यस अघि पक्राउ परेका १४ जनालाई थप अनुसन्धानका लागि बुधबार काठमाडौं जिल्ला अदालतले प्रहरीलाई थप ३ दिन प्रहरी हिरासतमा राख्न अनुमती दिएको थपयो ।
बादल पुत्र प्रतीक र इन्द्रजित राई पुत्र निरज फरार
यो प्रकरणमा दोषी ठहर गर्दै प्रहरीले पक्राउ पूर्जी जारी गरेका नेकपा (एमाले)का उपाध्यक्ष तथा पूर्व गृह मन्त्री रामबहादुर थापा ‘बादल’का छोरा प्रतीक र यही प्रकरणमा पक्राउ परेका डा.इन्द्रजित राईका छोरा निरज फरार रहेको र उनीहरुको खोजी भइरहेको प्रहरीको भनाइ छ ।
टोपबहादुर र डा.इन्द्रजित योजनाकार
अहिलेसम्मको अनुसन्धानका क्रममा प्राप्त प्रमाणले यो प्रकरणको योजनाकार नेकपा (एमाले)का सांसद टोपबहादुर रायमाझी र पूर्व गृह मन्त्री तथा नेकपा (एमाले)का उपाध्ययक्ष रामबहादुर थापा ‘बादल’का सुरक्षा सल्लाहकार डा.इन्द्रजित राईतर्फ सझिएको अनुसन्धानमा सम्लग्न एक प्रहरी अधिकृतको भनाइ छ ।