नक्कली भुटानी शरणार्थी प्रकरणमा दोषी रहेको भन्दै प्रहरीको खोजी सूचीमा रहेकी ललितपुरकी ३२ वर्षीय लक्ष्मी महर्जनलाई आज प्रहरीले पक्राउ गरि जिल्ला सरकारी वकीलको कार्यालय , काठमाडौं र काठमाडौ् जिल्ला अदालतमा पेश गरेको जनाएको छ । उनलाई प्रहरीले कहाँबाट कसरी पक्राउ ग-यो भन्ने बारेमा भने केही बताइएको छैन ।
यो प्रकरणमा उनको बैंक खाता प्रयोग भएको प्रहरी अनुसन्धानबाट खुलेको बताइएको छ ।
उनी पक्राउ परेसँगै यो प्रकरणमा पक्राउ पर्नेको संख्या १७ पुगेको छ । यो प्रकरणमा दोषी रहेको भनिएका पूर्व गृह मन्त्री रामबहादुर थापा ‘बादल’का छोरा प्रतिक, प्रहरी हिरासतमा रहेका डा. इन्द्रजित राईका छोरा निरज सहित १३ जना फरार रहेकोले उनीहरुको खोजी भइरहेको प्रहरीले जनाएको छ ।
यो प्रकरणमा दोषी रहेको भन्दै प्रहरीले अनुसन्धान गरी बुझाएको प्रतिवेदनको आधारमा जिल्ला सरकारी वकीलको कार्पालय, काठमाडौंले ३० जना विरुद्ध काठमाडौं जिल्ला अदालतमा यही बुधबार भिन्नाभिन्नै ३ प्रकृतिका अपराध कसुरमा सम्लग्न भएको किटानका साथ संविधान र प्रचलित कानुन बमोजिम दण्ड सजायको माग गरी मुद्धा दायर गरेको जानकारी दिइएको छ तर प्रहरीले भने भुटानी शरणार्थीको नाममा संयुक्त राज्य अमेरिका पठाई दिने भन्दै ९७५ जनाबाट रु.१० लाखदेखि रु.५० लाखसम्म र उठाएको भनिएको यो प्रकरणमा अनुसन्धानबाट ३३ जना दोषी पाइएकोले उनीहरु विरुद्ध मुद्धा चलाउनु पर्ने विषयको अनुसन्धान प्रतिवेदन जिल्ला सरकारी वकीलको कार्यालय, काठमाडौंमा प्रतिवेदन बुझाएको बताइएको थियो ।
यो प्रकरणमा पक्राउ परेकाहरुको आजबाट काठमाडौं जउल्ला अदालतमा बयान शुरु भएको बताइएको छ ।