भक्तपुरका दुबै क्षेत्रको प्रतिनिधि सभा निर्वाचनको मत गणना सकिदा क्षेत्र नं.१ मा नेपाल मजदुर किसान पार्टीका प्रेम सुवाल निकटतम प्रतिद्वनदी नेकपा (एमाले)का नवराज गेलाललाई ३०,७९३ मतान्तरले पछि पारी पुन: विजयी हुनुभयो भने भक्तपुर क्षेत्र नं.२ मा नेपाली कांग्रेसका दुर्लभ थापा क्षेत्री निकटतम प्रतिद्वन्दी नेकपा (एमाले)का महेश बस्नेतलाई ९५७ मतान्तरले पछाडि पारी विजयी हुनुभयो ।
भक्तपुर क्षेत्र नं.१ का नेपाल मजदुर किसान पार्टीका सुवालले ४२,७६१ मत पाउदा उहाँका प्रतिस्पर्धी नेकपा (एमाले)का गेलालले ११,९६८ र राप्राका भरतबहादुर खड्काले ७,२२२ र नेकपा (माके)का सुनिल गोठेले ५,१६५ मत पाउनुभएको छ । चाँगुनारायण नगरपालिकाको मत गणना नसकिदासम्म नेकपा (एमाले)का गेलाल भन्दा केही पछि रहेका नेपाल मजदुर किसान पार्टीका सुवालले भक्तपुर नगरपालिकाको मत गणना समाप्त हुदा धेरै बढी मतान्तरमा विजयी हुनुभयो । यो क्षेत्रमा २०४८ सालदेखि यता सबै निर्वाचनमा नेपाल मजदुर किसान पार्टीले जित्तै आएको छ । २०४८, २०५१ र २०५६ मा भएका प्रतिनिधि सभा तथा २०६४ र २०७० सालको संविधान सभाको निर्वाचनमा सोही पार्टीका अध्यक्ष नारायणमान बिजुक्छे ‘रोहित’ले जित्नुभएको थियो भने २०७४ र २०७९ सालको प्रतिनिधि सभाको निर्वाचनमा भक्तपुर नगरपालिकाका पूर्व मेयर समेत रहेका सुवालले जित्नुभएको हो ।
उता भक्तपुरको क्षेत्र नं.२ बाट प्रतिनिधि सभा सदस्य निर्वाचित नेपाली कांग्रेसका दुर्लभ थापा क्षेत्रीले २४,२३९ पाउदा नेकपा (एमाले)का महेश बस्नेतले २३,२८२ र नेपाल मजदुर किसान पार्टीकी अनुराधा थापा मगरले ७,१२७ मत पाउनुभएको थियो । यो क्षेत्रमा २०४८ साल यताका चुनावमा कहिले , नेपाली कांग्रेस , कहिले नेपाल मजदुर किसान पार्टी र कहिले नेकपा (एमाले)का उम्मेद्वार विजयी हुदै आउनुभएको छ । इन्द्रेको बाउ चन्द्रे आएपनि आफूलाई हराउन नसक्ने भन्दै हिड्ने गरेका नेकपा (एमाले)का नेता महेश बस्नेतलाई सत्ता गठबन्धनका साझा उम्मेद्वार नेपाली कांग्रेस दुर्लभ थापा क्षेत्रीले पराजीत गर्नुभयो । यो निर्वाचनमा पराजीत बस्नेतले सोही निर्वाचन क्षेत्रमि २०७४ सालको निर्वाचनमा वाम गठबन्धनको सहयोगमा पूर्व सभामुख तथा नेपाली कांग्रेसका उम्मेद्वार दमननाथ ढुंगानालाई भारी मतान्तरले पराजीत गर्नुभएखो थियो ।